ભાવનગર,

જિલ્લા પંચાયતના દસ રોજમદારોને જીલ્લા વિકાસ અધિકારીએ આજરોજ છૂટા કરવાનો મૌખિક ઓર્ડર આપી દેતા ખળભળાટ મચી ગયો છે.

રાજ્ય સરકારના પરિપત્રના અનુસંધાને છૂટા કરાયા અને હવે તેમને પુન ઃ સ્થાપિત પણ કરાશે

જિલ્લા પંચાયતમાં વર્ષોથી રોજમદાર તરીકે કામ કરતાં દસ જેટલા કર્મચારીઓને આજે ડી.ડી.ઓ. એ એકાએક છૂટા કરી દેવાનો મૌખિક ઓર્ડર છોડતાં સન્નાટો છવાય ગયો છે. જે દસ કર્મચારીઓને છૂટા કરવાનું સૂરસૂરિયું છોડાયું છે તેમાં પથિકાશ્રમના ૩ કર્મચારીઓ અને બાકીના જીલ્લા પંચાયતમાં જુદા જુદા વિભાગમાં ફરજ બજાવતા સાતેક કર્મચારીઓનો સમાવેશ થાય છે. આ કર્મચારીઓ વર્ષોથી ફિક્સ પગારે કામ કરી રહ્યા છે.

અનિવાર્ય સંજોગો સિવાય હવે પછી નવી ભરતી ન કરવી અને જો સંજોગોવશાત ભરતી કરવી પડે તો નાણા વિભાગની પૂર્વમંજૂરી લેવી, રાજ્ય સરકારનો આ પરિપત્ર આવ્યો છે. તે અનુસંધાને આ રોજમદારોને જીલ્લા વિકાસ અધિકારીએ છૂટા કરવાનો મૌખિક ઓર્ડર આપ્યો હોવાનું જાણવા મળે છે. વઘુમાં આ રોજમદારોને છૂટા કરવાનું કહી દીધા બાદ હવે આ કર્મચારીઓને સ્વભંડોળના ખર્ચે પાછા લઈને પુન ઃ સ્થાપિત કરવાની પણ વિચારણા થઈ રહી છે.