મુંબઇ - મહારાષ્ટ્રમાં આવતીકાલે જન્માષ્ટમી નિમિત્તે થનારી દહીંહાંડીની ઉજવણીમાં થાણેએ સૌનું ધ્યાન ખેંચ્યું છે. થાણેમાં રાષ્ટ્રવાદી કોંગ્રેસ પાર્ટી (એનસીપી)ના નેતા જીતેન્દ્ર અવ્હાડના નેતૃત્વ હેઠળના 'સંઘર્ષ', શિવસેનાના નેતા પ્રતાપ સરનાઇકના નેતૃત્વ હેઠળના 'સંસ્કૃતિ' મંડળના ગોવિંદા તથા શિવસેનાના નેતા એકનાથ શિંદેના નેતૃત્વ હેઠળની ટેંભીનાકા દહીંહાંડીના ગોવિંદા આવતીકાલે ધૂમ મચાવશે.
આવતીકાલે સર્જાનારા વિક્રમ માત્ર ગોવિંદા કેટલા સ્તરનો પીરામીડ રચે છે તે પૂરતું મર્યાદિત નહીં રહે. ગોવિંદા પર આકાશમાંથી પુષ્પવૃષ્ટિ કરવાથી લઇને દહીંગાંડી ફોેડવાના સમગ્ર કાર્યક્રમની થ્રીડી ફિલ્મ ઉતારવા સુધીના વિક્રમ સર્જવાની તૈયારી કરીને દહીંહાંડીના આયોજકો એકબીજાને પાછળ પાડી દેવાના પ્રયાસ કરી રહ્યા છે.
હજારો ગોવિંદા અને દર્શકો પર પુષ્પવૃષ્ટિ કરવા અવ્હાડે હેલિકોપ્ટરની વ્યવસ્થા કરી છે. આ પ્રસંગે દેશભરમાંથી સમાજવાદી પક્ષ, બહુજન સમાજ પક્ષ, અન્નાદ્ર મુક. અને બીજેડીના ૨૮ સંસદસભ્યો પણ ઉપસ્થિત રહેવાના છે. અવ્હાડના કાર્યાલયે જણાવ્યું છે કે સુપરસ્ટાર અક્ષયકુમાર પણ હાજર રહે તેવી શક્યતા છે પણ આ ખ્યાલ બાબતે ટિપ્પણી કરતાં અવ્હાડે કહ્યું હતું કે હું કોઇ પણ સુપરસ્ટાર માટે૧૫ મિનિટ પણ ફાળવી ન શકું. દર મિનિટે લોકોનાં ધાડેધાડાં આવતા હોય એવે વખતે હું સુપર સ્ટાને બોલાવું તો લોકો ગોવિંદાને નહીં સુપરસ્ટારને જ જોયા કરે.
મોટા પાયે યોજાતી દહીંહાંડીમાં વરલીના જંભૂરી મેદાનમાં એનસીપીના વિધાનસભ્ય અને ગૃહ નિર્માણ પ્રધાન સચીન આહિર અને તેમનાં પત્ની સંગીતા દ્વારા સંચાલીત સંકલ્પ પ્રતિષ્ઠિત આયોજીત દહીંહાંડીનો સમાવેશ થાય છે. અહીં, ભગવાન શ્રીકૃષ્ણના બાળપણથી લઇને યુવાવસ્થા સુધીના જીવનની ઝાંખી કરાવતાં દ્રશ્યોને કલાકારો અંતિમ સ્પર્શ આપી રહ્યા છે. આ કથાપટ (સ્ટોરીબોર્ડ)ની વિશેષતા એ છે કે તેની ટોચ પર ૨૦ ફૂટ ઊંચાઇનું કાળા નાગનું કટઆઉટ છે અને આ નાગ પર બાળકૃષ્ણ નૃત્ય કરતા દર્શાવાયા છે.
સંગીતા આહિરે કહ્યું હતું કે અભિનેતા સલમાન ખાન તેના પૂરા પરિવાર સાથે આવવાનો છે તથા ક્રિકેટર હરભજનસિંહ પણ દક્ષિણ આફ્રિકા જતા પહેલાં અહીં આવવાનો છે. આ ઉપરાંત ટેલિવિઝન સિરીઅલ 'બાલિકા વધુ'ના કલાકારો અવિકા ગોર તથા અવિનાશ મુખરજી લોકોના આકર્ષણનું કેન્દ્ર બનશે. તો ગાયક સુખવિન્દરસિંહ સંકલ્પની દહીંહાંડી ખાતે ગોવિંદા સાથે તો તાજેતરમાં ટીવી સિરીઅલમાંથી ફિલ્મ તરફ વળેલી પ્રાચી દેસાઇ સરનાઇકની દહીંહાંડીમાં મહિલા ગોવિંદા સાથે તો અભિનેતા આફતાબ શિવદાસાની પુરુષ ગોવિંદા સાથે જોડાશે. તેમ જાણવા મળ્યું છે.
