અમદાવાદ,
ગુજરાત યુનિવર્સિટી સાથે જોડાયેલી ૮૭ ઉપરાંત બી.એડ કોલેજોમાં પ્રવેશ કાર્યવાહી પૂર્ણ થયા પછી પણ અંદાજે ૨ હજાર ઉપરાંત બેઠકો ખાલી પડી છે. આ ખાલી બેઠકો માટે હજુસુધી કોઇ નિર્ણય કરવામાં આવ્યો નથી. બીજીબાજુ સંચાલકો ઇજેનરી-ફાર્મસીની જેમ આ બેઠકો ભરવાની સત્તા કોલેજોને સોંપી દેવામાં આવે તેવી માંગણી કરવામાં આવી હતી. જેના અનુસંધાનમાં દરેક કોલેજો પાસેથી ૫૦ હજાર રૂપિયા ડેવલપમેન્ટ ફી લઇને બેઠકો ભરવાની સત્તા આપવાનો નિર્ણય કરાયો હોવાનું જાણવા મળ્યું છે.આ પ્રમાણે બી.એડમાં પ્રવેશ પ્રક્રિયા કરવામાં આવ્યા પછી પણ સરકારી સહિત જુદી જુદી બી.એડ કોલેજોમાં ૩ હજાર ઉપરાંત બેઠકો ખાલી પડી હતી. પરિણામે નવા વિદ્યાર્થીઓની પ્રવેશ કાર્યવાહીની સાથે સાથે જૂના વિદ્યાર્થીઓનું રિશફલિંગ પણ પૂર્ણ કરી દેવામાં આવ્યું હતુ.ં આમછતાં જુદી જુદી કોલેજોમાં ૨ હજાર બેઠકો ખાલી પડી છે.કાઉન્સિલના નિયમ પ્રમાણે ચાલુ વર્ષે પ્રવેશની લધુત્તમ લાયકાત ઘટાડી શકાય તેમ ન હોવાથી સંચાલકોએ આ ખાલી બેઠકો ભરવાની સત્તા કોલેજને સોંપી દેવાની માંગણી શરૂ કરી છે. જો કે,યુનિવર્સિટી દ્વારા આગામી દિવસોમાં ખાલી બેઠકો ભરવાની મંજુરી આપી દેવાનું નક્કી કરવામાં આવ્યું છે. પરંતુ દરેક કોલેજો પાસેથી ડેવલપમેન્ટ ફીના નામે ૫૦ હજાર રૂપિયા લઇને આ બેઠકો ભરવાની મંજુરી આપવામાં આવશે.