સેકન્ડ લોએસ્ટને કામ આપવાના નિર્ણય અંગે પુનઃ વિચારણા માટે કમિશનરની ભલામણ ફગાવાઈઃ સ્ટેન્ડિંગમાં બહુમતીથી મંજૂરી

અમદાવાદ,
અમદાવાદ મ્યુનિસિપલ કોર્પોરેશનની ચૂંટાયેલી પાંખની મુદત પૂરી થવાને આડે હવે ગણતરીના દિવસો બાકી રહ્યા છે ત્યારે સત્તાધારી ભાજપે પોતાના માનીતા કોન્ટ્રાક્ટરોને રૂા.૪ કરોડના કામોની લ્હાણી કરી દીધી છે. નિયમો નેવે મૂકીને પૂર્વ ઝોનમાં બે વોટર ડીસ્ટ્રીબ્યુશન સ્ટેશનની કામગીરી સોંપવા અંગે અગાઉ કરાયેલા નિર્ણયને કારણે વિસંગતતા સર્જાતી હોવાથી તે અંગે પુનઃ વિચારણા કરવા મ્યુનિ. કમિશનરે કરેલી દરખાસ્તને ફગાવી દઈને તેમજ કોંગ્રેસના વિરોધ છતાં શાસક પક્ષે બહુમતીથી મંજૂરીની મહોર મારતાં વિવાદ સર્જાયો છે.
અમદાવાદના પૂર્વ ઝોનમાં આવેલા રખિયાલ અને અમરાઈવાડી વોર્ડના વોટર ડીસ્ટ્રીબ્યુશન પંપીંગ સ્ટેશનના ઈલેક્ટ્રીક અને મીકેનીકલની ઈક્વિપમેન્ટ અને પાંચ વર્ષ માટે ઓપરેશન અને મેઈન્ટેનન્સની કામગીરી માટે કુલ રૂા.૩ કરોડ, ૮૬ લાખના ખર્ચના કામ ફર્સ્ટ લોએસ્ટના ભાવથી સેકન્ડ લોએસ્ટ કોન્ટ્રાક્ટરને આપવાના કામ સોંપવા અંગે વોટર સપ્લાય કમિટી અને સ્ટેન્ડિંગ કમિટીમાં કોંગ્રેસના વિરોધ સાથે બહુમતીથી દરખાસ્ત મંજૂર કરાઈ હતી. મ્યુનિ. ભાજપ દ્વારા કરાયેલા આ નિર્ણયના અમલમાં વિસંગતતા સર્જાતી હોવાથી અગાઉ થયેલા ઠરાવ બાબતે પુનઃ વિચારણા માટે સ્ટેન્ડિંગ કમિટીમાં પુનઃ રજૂ કરવા મ્યુનિસિપલ કમિશનરે ભલામણ કરી હતી. આજે યોજાયેલી સ્ટેન્ડિંગ કમિટીમાં મ્યુનિસિપલ કમિશનરની ભલામણને ફગાવી દઈને કોર્પોરેશનમાંંં સત્તાધારી ભાજપ દ્વારા પોતાના માનીતા કોન્ટ્રાક્ટરને કામ આપવા અંગે વિવાદાસ્પદ નિર્ણય લેવાયો હતો. આમ, મ્યુનિસિપલ કોર્પોરેશનમાં સ્ટેન્ડિંગ કમિટી સર્વોચ્ચ સત્તા ધરાવતી હોવાની બાબત પુરવાર થઈ છે. પૂર્વ ઝોનમાં રખિયાલ હાઉસિંગ વોટર ડીસ્ટ્રીબ્યુશન પંપીંગ સ્ટેશન માટેના ઈલેક્ટ્રીકલ-મીકેનીકલની ઈક્વીપમેન્ટ્સ એસઆઈટીસી તથા પાંચ વર્ષ માટે ઓપરેશન અને મેઈન્ટેનન્સની કામગીરી માટે ટેન્ડર મંગાવાયા હતા. રૂા.૧ કરોડ, ૮૧ લાખના આ કામ માટે ફ્લો મોર કંપની લી.નું ટેન્ડર ફર્સ્ટ લોએસ્ટ આવ્યું હતુ. આમ છતાં શાસક પક્ષ દ્વારા સેકન્ડ લોએસ્ટ બીડર એફીસીઅન્ટ એન્જિનીયરિંગ પ્રા. લી.ને કામ આપવામાં આવ્યું હતું. અમરાઈવાડી (સુભાષ માર્કેટ) વોટર ડીસ્ટ્રીબ્યુશન સ્ટેશન માટે ઈલે.-મીકે.ની ઈક્વીપમેન્ટ્સના એસઆઈટીસી અને પાંચ વર્ષના એપરેશન અને મેઈન્ટેનન્સના ટેન્ડર મંગાવાયા હતા. રૂા.૧ કરોડ, ૭૩ લાખના આ કામ માટે પણ ફ્લો મોર કં. લી.નું ટેન્ડર ફર્સ્ટ લોએસ્ટ આવ્યું હતું. આમ છતાં મ્યુનિ. ભાજપ દ્વારા સેકન્ડ લોએસ્ટ બીડર પટેલ બ્રધર્સને કામ આપવામાં આવ્યું હતું. કોંગ્રેસી સભ્યોના વિરોધ સાથે ઉપર્યુક્ત કામની બંન્ને દરખાસ્તો બહુમતીથી મંજૂર કરાઈ હતી. આ અંગે હસનલાલાએ કહ્યું કે, આ બંન્ને કામ સેકન્ડ લોએસ્ટને આપવા અંગેના નિર્ણય બાબતે ફેરવિચારણા કરવા મ્યુનિસિપલ કમિશનરની ભલામણની ઉપરવટ જઈને શાસક પક્ષે નિર્ણય લીધો છે. આ પ્રકારનો નિર્ણય લેવામાં કંઈક રંધાયું હોવાની દહેશત સેવાઈ રહી છે.