મુંબઇ -
નાર્કોટિક્સ કન્ટ્રોલ બ્યુરોએ થાણેમાંથી રૃ. ૨૬ કરોડનું પાર્ટી ડ્રગ જપ્ત કર્યાના અઠવાડિયા પછી શનિવારે કસ્ટમ્સ વિભાગે આંતરરાષ્ટ્રીય સ્તર પર રૃ. ત્રણ કરોડની કિંમતનું 'ડેટ રેપ ડ્રગ' તરીકે પ્રખ્યાત કેફી દ્રવ્ય જપ્ત કર્યુ છે. કેટામાઇન હાઇડ્રોક્લોરાઇડ તરીકે ઓળખાતું કેફી દ્રવ્ય શહેરના આંતરરાષ્ટ્રીય વિમાનમથકેથી જપ્ત કરવામાં આવ્યું હતું.

છત્રપતિ શિવાજી ટર્મિંનસ સ્થિત એર કાર્ગો કોમ્પ્લેક્સ ખાતેથી પાર્સલમાંથી આ કેફી દ્રવ્ય મળ્યું હતું.૧૨ બોક્સ ધરાવતા દાડમની સાથે કેફી દ્રવ્ય સંતાડવામાં આવ્યું હતું. કેફી દ્રવ્ય તાઇવાન ખાતે આવેલા તાઇપેઇમાં દાણચોરી કરીને મોકલવાનું હતું. આ સંદર્ભમાં કસ્ટમ્સ વિભાગે સુંગ યુઆન સુઆન નામે ચીની નાગરિકની ધરપકડ કરી છે.

કાર્ગો કોમ્પ્લેક્સની નિકાસ શાખા પર ફરજ બજાવતા કસ્ટમ અધિકારીઓને કૃષિ ઉત્પાદન રાખવાના સ્થળેથી કેફી દ્રવ્ય મળ્યું હતું.
બેંગલોરના ડિરેક્ટોરેટ ઓફ રેવન્યુ ઇન્ટેલિજન્સ (ડીઆરઆઇ) દ્વારા ચીની સંુગ સુઆનના નામે રેડ કોર્નર નોટિસ જારી કરવામાં આવી હોવાને પગલે કસ્ટમ અધિકારીઓ સુઆનને શોધવા સાથે તેની દાણચોરી સંબંધી પ્રવૃત્તિઓ પર પણ બાજનજર રાખતા હતા. અગાઉ જપ્ત કરવામાં આવેલા કેટામાઇન (કેફી દ્રવ્ય)ના સંદર્ભમાં બેંગલોરસ્થિત ડીઆરઆઇ વિભાગ સુઆનની ધરપકડ કરવા માગતો હતો.

શનિવારે મોડી રાતે હોંગકોંગ જતા કેથે પેસિફિકનું સીએક્સ-૬૮૪ વિમાનમાં સુઆન પ્રવાસ કરવા જતો હતો ત્યારે ઇમિગ્રેશન અધિકારીઓએ તેની ધરપકડ કરી હતી. ત્યાર બાદ મુંબઈ કસ્ટમ્સના એર ઇન્ટેલિજન્સ યુનિટ (એઆઇયુ)ને સુઆનની સોંપણી કરવામાં આવી હતી. રવિવારે સુઆનનું નિવેદન નોંધવામાં આવ્યું હતું.
તાઇપેઇ જતા અગાઉ સુઆને એર કાર્ગો મારફતે હોંગકોંગ ખાતે નિકાસ માટે દાડમનું પાર્સલ બુક કરાવ્યું હતું.

એક અધિકારીએ પોતાની ઓળખ ગુપ્ત રાખવાની શરતે જણાવ્યું હતું કે એઆઇયુ અધિકારીઓએ સુઆનની જડતી લીધી ત્યારે તેની પાસેથી ૨૬,૫૦૦ પાઉન્ડ (રૃ. ૧૨.૦૭ લાખ)ની રકમ મળી આવી હતી. જેને પગલે સુઆન તે રકમની દાણચોરી કરવાનો પ્રયાસ કરતો હોવાની પણ જાણ થઇ હતી. સુઆનની હાથમાં રહેલી બેગમાંથી રકમ મળી હતી.

મંુબઈમાંથી જંગી પ્રમાણમાં કેફી દ્રવ્ય (કેટેમાઇન)જપ્ત કરવામાં આવ્યું હોવાનો આ બીજો બનાવ છે. ૨૦૦૮ના ઓક્ટોબર મહિનામાં ડીઆરઆઇએ મુંબઇ તથા નજીકમાં આવેલા થાણે જિલ્લાના ભિવંડીમાંથી ૪૦૦ કિલો કેફી દ્રવ્ય જપ્ત કર્યુ હતું. જે દાણચોરી દ્વારા ચીનમાં મોકલવાનું હતું.
ગયા અઠવાડિયે નાર્કોટિક્સ કન્ટ્રોલ બ્યુરોએ થાણેના ઔદ્યોગિક એકમના વિસ્તારમાંથી રૃ. ૨૬ કરોડની કિંમતનું કેફી દ્રવ્ય જપ્ત કર્યુ હતું. જે બદલ આઠ વિદેશી સહિત એક ભારતીયની ધરપકડ કરવામાં આવી હતી.