ટંકારા તાલુકાના હડાળા ગામના પાટીયા પાસેથી આજે સવારે ગુમ ભરવાડ યુવાનની લાશ મળી આવતા સનસનાટી મચી જવા પામી છે.
જાણવા મળતી વિગતો મુજબ હડાળા ગામના પાટીયા પાસે આજે સવારે એક યુવાનની ચાદર ઓઢાડેલી લાશ પડી હોવાની સ્થાનીક પોલીસને ગ્રામજનો દ્રારા જાણ કરવામાં આવી હતી. જેથી પોલીસ સ્ટાફ તાકીદે ઘટનાસ્થળે પહોંચી ગયો હતો. પોલીસની તપાસમાં લાશ હડાળા ગામના સેલા કાનાભાઈ સાનીયા નામના ૨૫ વર્ષના ભરવાડ યુવાનની હોવાનું બહાર આવતા પરિવારજનોની પુછપરછ શરૂ કરી હતી.
પુછપરછ દરમિયાન ભરવાડ યુવાન ગતરાત્રીના ઘેરથી જમીને નીકળ્યા બાદ પરત આવ્યો ન હતો. ચિંતાતુર પરિવારજનો દ્રારા તેની મોડી રાત સુધી શોધખોળ કરાઈ હતી. દરમિયાન આજે સવારે ગામના પાટીયા પાસેથી ચાદર ઓઢાડેલી હાલતમાં તેનો મૃતદેહ મળી આવ્યો હતો.
પ્રાથમીક તપાસ દરમિયાન મૃતક સાથે કોઈ ઝપાઝપી કે તેના શરીર પર કોઈપણ જાતના ઈજાના નિશાન દેખાતા ન હોય મૃત્યુનું ચોકકસ કારણ જાણવા પોલીસ દ્રારા ફોરેન્સીક નિષ્ણાંતોની મદદ લઈ વધુ તપાસ શરૂ કરવામાં આવી છે.
મૃતક ભરવાડ યુવાન રીક્ષા ડ્રાઈવીંગનો ધંધો કરે છે અને બે વર્ષ પુર્વે જ તેના શિલુબેન સાથે લ થયા હતા અને છ માસ પુર્વે જ તેણીને આણુ વાળીને તેડી આવ્યા હતા. મૃતક ચાર ભાઈ એક બહેનમાં નાનો છે. આ બનાવથી ભરવાડ પરિવારમાં શોકનું મોજુ પ્રસરી ગયું છે.